केशवराज पोख्रेलले गरे रेलिङ कैंजले समष्टिमा चुनाउ प्रचार

बिजनबारी: गोजमुमो विनय खेमा दार्जिलिङ विधानसभा समष्टिका उम्मेद्वार केशवराज पोख्रेलले रेलिङ कैंजले समष्टिमा चुनावी भ्रमण गर्दै आज रेलिङ आइपुगे। तिनले रेलिङ शिवालय मन्दिरमा दर्शन गरेपछि रेलिङदेखि बिहिबारेसम्म पथ यात्रा गरे। त्यसपछि तिनी रेलिङ, बिहिबारे, साम्सु, लामा गाउँ हुँदै कैंजले पुगे। हजारौं संख्यामा मानिसहरू भेला भएर तिनलाई भव्य स्वागत जनाए। कैंजले बजारमा एउटा चुनावी पथ सभालाई पनि सम्बोधन गर्दै तिनले यस क्षेत्रका मानिसहरूले धेरैचोटि मतदान गरेर धेरैजना नेताहरूलाई जिताएर पठाए तापनि कसैले पनि यस क्षेत्रका मानिसहरूको समस्याहरूबारे कुनै पहल गरेन। यहाँको माटोले जन्माएको, हुर्काएको छोरा हुँ, आफू विधायक बनेपछि क्षेत्रका मूलभूत समस्यामाथि काम गर्ने तिनले आश्वासन दिएका छन्। पथसभालाई गोजमुमो दार्जिलिङ ब्राञ्च अध्यक्ष आलोक कान्तामणि थुलुङ, निर्मल छेत्री आदिले पनि सम्बोधन गरेका थिए। समष्टि सभापति शरण साङ्गबुको अध्यक्ष्यतामा सम्पन्न सभामा गोजमुमो उपाध्यक्ष सतीश पोख्रेल प्रमुख रूपमा उपस्थित थिए।