खोरीबारीमा मादक पदार्थ सहित 2 जना युवक पक्राउ

खोरीबारी, 6 जनवरी (निसं): खोरीबारी थाना पुलिसले खोरीबारीको गौरसिंग जोतमा छापमार अभियान चलाएर मादक पदार्थसहित दुई जना युवकलाई पक्राउ गरेको छ। पक्रा परेका आरोपीको नाम अभिरुल सुब्बा र प्रज्जल राई हो। यी दुवै जना दार्जिलिङको जोरबङ्ग्लो निवासी बताइएको छ।
गोप्य सूत्रबाट सूचना पाएपछि पुलिसले आइतबार राति खोरीबारीको पानीट्याङ्की संलग्न गौरसिंग जोतको एउटा घरमा छापामार अभियान चलायो। तर पुलिस आएको खबर पाउन साथ मादक पदार्थको व्यापारी घटनास्थलबाट भागे। यसपछि पुलिसले मादक पदार्थ किन्न आएका दुई जना युवकलाई पक्राउ गरेर छानबिन गर्दा तिनीहरूबाट 58 ग्राम ब्राउन सुगरसहित लाखौँ रुपियाँ उद्धार गऱ्यो। त्यसपछि उनीहरूलाई पुलिसले पक्राउ गऱ्यो। पुलिसले आरोपीहरूको एउटा बाइक पनि जफत गरेको छ। पक्रा परेका व्यक्तिहरूलाई सोमबार सिलगढी अदालतमा पेश गऱ्यो। पुलिसले घटनास्थलबाट भागेका मादक पदार्थ व्यापारीको खोजी गरिरहेको छ।