खोरीबारीमा पारिवारिक विवाद हुँदा महिला सहित तीनजनाको हत्या

खोरीबारी : पारिवारिक विवादलाई लिएर एउटी महिला सहित तीनजना व्यक्तिको हत्या गरेको एकजना व्यक्तिविरुद्ध अभियोग उठेको छ। उक्त घटना खोरीबारी थाना अन्तर्गत सतीशचन्द्र चियाकमानको दीपा लाइन इलाकामा घटेको हो। प्राप्त जानकारी अनुसार गत साँझ मारियानुस नामक गरेका एकजना व्यक्तिले महरू उराव, पेना उराव र अल्बर्ट मिन्जमाथि हमला गर्दा तीनैजना गम्भीर रूपमा घाइते भए। घाइतेहरूलाई तत्कालै उद्धार गरेर खोरीबारी ग्रामीण अस्पतालमा लगे तापनि त्यहाँका चिकित्सकले महरू उराव र पेना उरावलाई मृत घोषित गरिदिए। अल्बर्ट मिञ्जको अवस्था गम्भीर रहेकोले तिनलाई उत्तरबंग मेडिकल कलेज एवम् अस्पतालमा रेफर गरिदिएपछि उपचार अवधि तिनको मृत्यु भएको बताइएको छ। घटनाको खबर पाएर खोरीबारी पुलिस घटनास्थलमा पुगेर आरोपी व्यक्तिलाई पक्राउ गरेपछि आज सिलगढी अदालतमा पेश गर्यो। पुलिसले घटनाको जाँच शुरू गरेको छ।