खरसाङ (निसं) : खरसाङ बार एसोसिएशनको वार्षिक साधारण सभा एसोसिएशनको उप सभापति सपना राईको अध्यक्षतामा खरसाङको एक होटलमा सम्पन्न भयो। बार एसोसिएशनको सचिव रमेश अग्रवालले सञ्चालन गरेका उक्त वार्षिक साधारण सभामा स्वागत सम्भाषण उप सभापति सपना राईले राखेका थिए। यसै सभामा विगत तीन चार वर्षको लेखा-जोखाको रिपोर्ट खरसाङ बार एसोसिएशनको सचिव रमेश अग्रवालले प्रस्तुत गरे। यसावधि तिनले विगत तीन चार वर्ष अवधि खरसाङ बार एसोसिएशनको कार्यहरू र उपलब्धिहरू विषयमा विस्तृत रुपमा जानकारी गराए।
तिनले विशेष गरी आफुहरूले 2018 मा नयाँ कमिटी गठन भएर जिम्मेवारी लिएपछि विभिन्न कार्यहरू गर्दै आएको र कोविदको कारणले सभा गर्न नपाएको बताउँदै एसोसिएशनले गरेका विभिन्न कार्यहरू विषयमा विस्तृत रुपमा जानकारी गराए। तिनले खरसाङ कोर्टमा सिनियर डिभिजन सिभिल कोर्ट थिएन, जुन हाम्रो पालोमा ल्याउन सफल भएको बताउँदै खरसाङ क्षेत्रका प्राय: मामिलाहरू सिलगढी जान्थ्यो जसलाई हामीले खरसाङमा नै ल्याउन सफल भएको तिनले बताएका छन्। आजको सभामा उप सभापति सपना राई, सह सचिव हेनतेन लामा, सह कोषाध्यक्ष पवन थापा, कार्यकारी सदस्यहरू प्रमोद थापा, सञ्जय गोयल, कृष्ण छेत्री र वरिष्ठ सदस्या आशा मुखिया लामा लगायत अन्यहरू उपस्थित रहेका थिए।