लाखौँ रुपियाँ ब्राउन सुगर उद्धार, महिला सहित 3 जना पक्राउ

सिलगढी : एसओजी र मतिगढा थाना पुलिसले संयुक्त अभियान चलाएर 300 ग्राम ब्राउन सुगर उद्धार गर्नको साथै महिला सहित 3 जनालाई पक्राउ गरेपछि आज सिलगढी अदालतमा पेश गर्यो। पक्रा परेकाहरूमा दिप्ती बर्मन, एमडी सरफराज र वाहन चालक श्याम हासदा सामेल छन्। तिनीहरूमध्ये दिप्ती बर्मन र एमडी सरफराज कुचबिहार निवासी हुन् भने श्याम हासदा सालुगढा निवासी हुन्। दिप्ती बर्मनले सिलगढीमा एउटा स्पामा काम गर्ने गर्थिन्। सरफराज र दिप्ती मिलेर मादक पदार्थको व्यवसाय गर्ने गर्दथे। अर्कोतिर वाहन चालक श्याम हासदाले दिप्ती र सरफराजलाई मादक पदार्थ तस्करी गर्नमा सहयोग गर्दथे। प्राप्त जानकारी अनुसार गत बुधबार राति मतिगढा थाना पुलिस र एसओजीले मायादेवी क्लब संलग्न इलाकामा अभियान चलाएर सन्देहको आधारमा एउटा वाहनलाई रोकेर छानबीन गर्दा दीप्ति बर्मनको पर्सबाट 300 ग्राम ब्राउन सुगरको प्याकेट उद्धार गरेको बताइएको छ। उक्त ब्राउन सुगर सिलगढीमा तस्करी गर्ने उद्देश्यले लगिरहेको थियो। उद्धार गरेको ब्राउन सुगरको अनुमानित बजार मूल्य लगभग 7 लाख रुपियाँ रहेको थाहा लागेको छ। घटनाको जाँच शुरू गरेको पुलिस सूत्रले जनाएको छ।