लोकप्रिय गायक कुमार सुब्बाको सालिग लेबोङ दार्जिलिङमा अनावरण

दार्जिलिङ (निसं): नेपाली सङ्गीत जगतका अति लोकप्रिय गायक कुमार सुब्बाको सालिगको अनावरण जीटीए प्रमुख कार्यपाल अनित थापाको बाहुलीबाट गरियो। साहित्य सङ्गीत कला संस्थान, लेबोङ, दार्जीलिङको तत्त्वावधान एवम् गोर्खाल्याण्ड क्षेत्रीय प्रशासनको सहयोगमा लेबोङ गोलाइ परिसरमा स्थापित नेपाली सङ्गीत जगतका अति लोकप्रिय गायक कुमार सुब्बाको सालिग गोर्खाल्याण्ड क्षेत्रीय प्रशासनका प्रमुख कार्यपाल अनित थापा अनि वरिष्ठ नाट्यकर्मी पुकार गुरुङद्वयका संयुक्त बाहुलीबाट अनावरण गरियो। यस अवसरमा क्षेत्रीय सभासद योगेन्द्र प्रधान, स्व. सुब्बाका पत्नी कमल कुमारी सुब्बा आदिको पनि उपस्थिति रहेको थियो। अनित थापाले अनावरण माथि बोल्दै भने, “जुन भूमिमा जन्मे, त्यही भूमिलाई आफ्नो कर्मस्थल बनाए अनि त्यही भूमिलाई योगदान दिँदै उनी त्यही भूमिमा देहावसान भए । त्यस्ता विभूतिलाई सम्मान दिँदै सालिग निर्माण गर्नु यहाँका मानिसहरूको ठूलो सोंच हो।”
स्मरण रहोस, 11 मार्च 1944 मा दार्जिलिङ सहरको थाना लाइनमा आमा कृष्णमती र बुबा वीर हाङ सुब्बाको घरमा जन्मेका कुमार सुब्बा सहरको भानुभक्त प्राथमिक विद्यालयमा गए, जहाँ उनका शिक्षकहरूमा प्रख्यात कवि अगमसिंह गिरी पनि थिए। सुब्बाले दार्जिलिङको टर्नबुल हाई स्कूलबाट कक्षा 10 को बोर्ड परीक्षा पास गरे पछि सन् 1964 मा हार्सिङ प्राइमरी स्कूलमा शिक्षकको रूपमा भर्ना भए। बाल्यकालदेखि नै गायन मन पराउने सुब्बा पछि पश्चिम बंगाल सूचना विभागको गीत र नाटक इकाईमा सामेल भए अनि 1985 मा संस्कृतिमा। सन् 1963 मा दार्जिलिङको गोरखा दु:ख निवारक सम्मेलन हलमा अशोक राईद्वारा लिखित र रचना गरिएको गीत गाएपछि सुब्बाले पहिलो पटक प्रस्तुति दिएका थिए र सन् 1968 मा कोलकाताको एचएमभी स्टुडियोमा आफ्नो पहिलो गीत रेकर्ड गर्न गएका थिए।
उनले पाएका धेरै पुरस्कार र प्रशंसाहरू मध्ये नेपालमा ‘राज्य अभिषेक’ रजत पदक (1974), दिसरी पुरस्कार, कोलकाता (1991), अरुणा लामा सालिग निर्माण पुरस्कार, बिजनबारी (1999), अरुणा लामा स्मृति पुरस्कार (2001), जनमुक्ति मोर्चा, दार्जिलिङ (2006 ) र संगीत सम्मान पुरस्कार, पश्चिम बंगाल सरकार (2012) सामेल छन्।