लङ्गभ्यू क्षेत्रको हर घर जल योजनाको कार्य सटीक र पारदर्शिता नभएको साथै भागोप्रमो-को राजनीति हस्ताक्षेप भएको आरोप

खरसाङ (निसं): खरसाङको लङ्गभ्यू चियाबारी निवासी निश्चल पाख्रीनले यहाँको गोदामधुरादेखि बरबटे गाउँ जाने सड़कको दयनीय अवस्थाबारे अनि हाल लङ्गभ्यू क्षेत्रमा भइरहेको हर घर जल योजनाको कार्यबारे अवगत गराउँदै यी कार्यहरू सठीक र पारदर्शितापूर्वक नभएको आरोप लगाएका छन्। तिनले विशेष गरेर लङ्गभ्यू गोदामधुरादेखि उकालो बरबोटे, रमिते जाने सड़कको दुरवस्थाबारे जानकारी गराउँदै यो सड़क निर्माणको निम्ति वर्तमान जीटीए अध्यक्ष अनित थापा यसअघि जीटीए अध्यक्ष भएकै समयमा आएको भए तापनि त्यसबेला यहाँको सड़क नबनिएर अन्यतिरकै बाटो बनिएको अनि यस सम्बन्धमा त्यसबेला स्वयम् अनित थापासँग सोध्दा तिनले टेक्नीकल मिस्टेक भनेर जवाब दिएको तथा आजसम्म यहाँको सड़क नबनिएको जनाए। तिनले हाल लङ्गभ्यू क्षेत्रमा भइरहेको हर घर जल योजनाको कार्यमा पनि राजनीति हस्ताक्षेप भएको अवगत गराउँदै पाख्रीङले एकातिर अनित थापाले यो कार्यमा तिनीहरूको कुनै हात नरहेको भनी बताउने गरेको तर अर्कोतिर तिनकै पार्टीका प्रतिनिधिहरूले गाउँ-गाउँमा गएर यस कार्यमा हस्ताक्षेप गरिरहेको आरोप लगाएका छन्।