मदारीहाट विधानसभा उपचुनाउ: तृणमूल र भाजपा प्रार्थीको पक्षमा चुनाउ प्रचार जोडतोडले शुरू

अलीपुरद्वार, 9 नोभेम्बर (निसं): मदारीहाट विधानसभा उपचुनाउका लागि सत्तारूढ राजनैतिक पार्टी तृणमूल काङ्ग्रेस अनि विपक्षी भाजपा पार्टीले आ-आफ्नो उम्मेदवारको पक्षमा चुनाउ प्रचार जोडतोडले शुरू गरेको छ। यसैक्रममा शनिबार तृणमूल पार्टीका उम्मेदवार जयप्रकाश टोप्पोले मदारीहाटको शिशुझुमरा ग्राम पञ्चायतका विभिन्न क्षेत्रहरूमा पुगेर जोडतोडको साथ चुनाउ प्रचार गरे।
यसवाहेक, जयप्रकाश टोप्पोले शिशुझुमरा ग्राम पञ्चायत र चिया बगानका विभिन्न इलाकाहरूमा पुगेर चुनाउ प्रचार गर्दै तृणमूलको पक्षमा मतदान गरिदिने जनतासित अपिल गरे। यस अवधि तिनीसित तृणमूल कार्यकर्ता अनि समर्थकहरू पनि उपस्थित थिए।
अर्कोतर्फ, भाजपा उम्मेदवार राहुल लोहारले मदारीहाट विधानसभा क्षेत्रको खैरबाडी अञ्चलसहित विभिन्न क्षेत्रहरूमा पुगेर चुनाउ प्रचार गरे। यस अवधि भाजपा उम्मेदवारले दार्जिलिङका सांसद तथा भाजपा प्रवक्ता राजू बिष्टको साथमा मदारीहाटका विभिन्न इलाकाहरूमा गएर चुनाउ प्रचार गरे।