मणिपुरको पैह्रोको घटनाप्रति शोक व्यक्त गर्दै विजय उत्सवको कार्यक्रम भोलिदेखि स्थगित गरिदिने अनित थापाको अपील

खरसाङ : मणिपुरको नोने जिल्लामा गत बुधबार अबेर राति गएको भीषण पैह्रोको घटनाप्रति अनित थापाले शोक व्यक्त गर्दै पार्टीका सबै समर्थकहरूलाई विजय उत्सव नमनाउने अपील गरेका छन्। तिनले जीतको विजय उत्सव होइन, दुःखित परिवारको घरमा गएर सहायता गरिदिने सबैलाई अपील पनि गरेका छन्। मणिपुरको पैह्रोमा परेर सहिद बनेका गोर्खे जवानहरूप्रति श्रद्धाञ्जलि अर्पण गर्दै भारतीय गोर्खा प्रजातान्त्रिक मोर्चाका अध्यक्ष अनित थापाले पार्टीका कार्यकर्ता, समर्थक अनि नेतृत्वहरूलाई विजय उत्सवको कार्यक्रम भोलिदेखि स्थगित गरिदिने अपील गरेका छन्। तिनले भने, मणिपुरमा सहिद भएका जवानहरू हाम्रै दाज्यु भाइहरू हुन्। तिनीहरूको निधनमा हामीले खुसी मनाउनु उचित होइन।