खरसाङ (निसं) : खरसाङको 28 नम्बर खरसाङ देवराली समष्टि अन्तर्गत अप्पर र लोवर चिम्नीका भारतीय गोर्खा प्रजातान्त्रिक मोर्चाको कार्यकर्ताहरूले मणिपुरमा भएको पैह्रोमा परेर ज्यान गुमाएका जवानहरूलाई श्रद्धाञ्जलि अर्पण गरे। भारतीय गोर्खा प्रजातान्त्रिक मोर्चाको खरसाङ महकुमा अन्तर्गत चिमनी क्षेत्रका नारी शक्ति, युवा शक्ति, पार्टीका पदाधिकारीहरू लगायत स्थानीयहरूले गत आइतबार साँझ हालै मणिपुरको पैह्रोको चपेटमा परेर शहीद बनेका गोर्खा जवानहरूलाई श्रद्धाञ्जलि अर्पण गर्दै आत्मा शान्तिको लागि मौन धारण गरे।
यसको साथै शोकित परिवारलाई ईश्वरले सहने शक्ति प्रदान गरुन् भनी प्रार्थना पनि गरियो। यस अवसरमा चिमनी क्षेत्रका पार्टी कार्यकर्ताहरु र गाउँलेहरूले मैनबत्ती बालेर श्रद्धाञ्जलि अर्पण गर्दै मैनबत्ती ऱ्याली पनि निकाले। उक्त ऱ्यालीमा पार्टी कार्यकर्ताहरू र स्थानीयहरूले शहीदहरू सदैव अमर रहुन् भनी नारा लगाउँदै मैनबत्ती ऱ्याली निकालेर शहीदहरूलाई श्रद्धाञ्जलि अर्पण गरे। यस अवसरमा स्थानीय गोपाल थापा अनि युवा शक्तिको तर्फबाट दिपेश थापाले 28 नम्बर समष्टिको सम्पूर्ण कार्यकर्ताहरू र जनताको तर्फबाट हालै मणिपुरको पैह्रोमा परेर ज्यान गुमाएका जवानहरूलाई श्रद्धाञ्जलि अर्पण गर्दै मौन धारण गरिएको बताए।