मतिगढा-नक्सलबारी आसनका भाजपा प्रार्थी आनन्दमय बर्मन कोरोना संक्रमित

सिलगढी : दार्जिलिङ, कालेबुङ र जलपाईगढी जिल्लामा पाँचौँ चरण अन्तर्गत आगामी 17 अप्रेलको दिन मतदान हुने भएको छ भने मतिगढा-नक्सलबारी आसनका भाजपा प्रार्थी आनन्दमय बर्मन कोरोना पोजेटिभ भएपछि भाजपा पार्टी चिन्तित बनेको छ। मतिगढा-नक्सलबारी भाजपा प्रार्थीको पक्षमा अब कसले अन्तिम समयको चुनाउ प्रचार गर्छ भन्ने विषयमा मन्थन शुरू भएको छ। आनन्दमय बर्मनले दिएको जानकारी अनुसार तिनले प्रधानमन्त्री नरेन्द्र मोदीको जनसभामा सामेल हुनको लागि कोरोना टेस्ट गराएका थिए भने जाँच रिपोर्ट पोजेटिभ आएको छ। रिपोर्ट पोजेटिभ आएपछि सबै सुरक्षा विधि पालन गर्दै हाल तिनी होम कोरेन्टाइनमा छन्। भाजपा सूत्रले दिएको जानकारीअनुसार चुनाउ मुखैमा रहेकोले आनन्दमय बर्मनको समर्थनमा मिथुन चक्रवर्ती, शुभेन्दु अधिकारी, दिलीप घोष जस्ता भाजपाका दिग्गज नेताहरूले चुनाउ प्रचार गर्न सक्नेछन्। आगामी सोमबार फेरि कोरोना टेस्ट गर्ने प्रार्थी आनन्दमय बर्मनले बताए।