मतिगढाको बालासन नदीमा डुबेर व्यक्तिको मृत्यु

सिलगढी :  मतिगढाको बालासन नदीमा डुबेर एकजना व्यक्तिको मृत्यु भएको छ। मृतक व्यक्ति मैनागढी निवासी फजिउल करिमको रूपमा चिन्हित गरिएको छ। प्राप्त जानकारी अनुसार मतिगढा थाना अन्तर्गत लेलिन कोलनी नजिक बालासन नदीमा 3 जना श्रमिकले बाँध बनाउने काम गरिरहेको समय तीमध्ये एकजना श्रमिक नदीमा डुबेको बताइएको छ। यसपछि अन्य श्रमिकहरूले तिनलाई उद्धार गर्ने प्रयास गरे तापनि उद्धार गर्न असफल भए। पछि उक्त श्रमिकको शव उद्धार गरेको बताइएको छ। घटनाको खबर पाएर मतिगढा थाना पुलिस घटनास्थलमा पुगेर शव उद्धार गरेर पोस्टमार्टमको लागि उत्तरबंग मेडिकल कलेज एवम् अस्पतालमा पठाउनको साथै घटनाको जाँच सुरू गरेको पुलिस सूत्रले जनाएको छ।