मिरिक महकुमा प्रशासनद्वारा कोभिड हेल्पलाइन नम्बर जारी

मिरिक: कोभिड -19 माहमारीको समयमा आम नागरिकहरु पर्याप्त सूचना अनि जानकारीको अभावमा भौतारिनु परिरहेको समय मिरिक महकुमा प्रशासनले एउटा हेल्पलाइन नम्बर शुरु गरेको छ। उक्त नम्बर सधैं 24 घण्टा खुल्ला रहने बताइएको छ। आज मिरिक महकुमा शासक जमिल फतिमा जेबाले प्रेस सम्मेलनको आयोजना गरेर उक्त हेल्पलाइन नम्बर मिरिक महकुमा क्षेत्रको निम्ति 9339690913 अनि दार्जिलिङ जिल्ला प्रशासनको निम्ति फोन नम्बर 0354-2255749 जारी गरेका छन्। महकुमा शासक जेबाले यो नम्बर सधैं खुल्ला रहने जहाँ कोरोना जाँच, एडमिशन, भ्याक्सिन, सेनिटाइजेसन, एम्बुलेन्स लगायत अन्य बिषयबारे जानकारी लिएर सेवा लिनु सक्ने बताएका छन्। तिनले राज्य सरकारद्वारा जारी इन्टिग्रेटेड कोभिड म्यानेजमेन्ट सिस्टम अनलाइन पोर्टलमार्फत पनि सूचना पाउन सकिने जानकारी दिँदै कोरोना माहमारीलाई जित्न सबै एकजुट भएर अघि आउने तथा मास्क सेनिटाइजरको प्रयोगसँगै शारीरिक दुरत्वलाई सदैव कायम राख्ने आग्रह गरेका छन्।