नाबालिकाको अश्लील फोटो सोशल मीडियामा भाइरल गरिदिने धम्की दिँदै ब्ल्याकमेल गरेको आरोपमा प्रेमी सहित 3 जना पक्राउ

सिलगढी : साइबर क्राइम थाना पुलिसले अश्लील फोटोको माध्यमद्वारा  नाबालिकालाई ब्ल्याकमेल गरेको आरोपमा  तीनजना युवकलाई पक्राउ गरेको छ। पक्रा परेकाहरूमा उत्तर दिनाजपुरको चोपड़ा निवासी जयनुल अली(19), मन्जय आलम (26) र रजीबुल शा  (19) सामेल छन्। प्राप्त जानकारीअनुसार सिलगढीमा एउटा पारिवारिक कार्यक्रम अवधि उक्त नाबालिकाको रिजाबुलसित भेट भएको थियो। उक्त भेटघाट केही दिनमा प्रेम सम्बन्धमा परिणत भएपछि दुवैमाझ शारीरिक सम्बन्ध बन्यो। यसपछि उक्त युवकले आफ्नी प्रेमिकालाई बारम्बार विभिन्न प्रकारले ब्ल्याकमेल गर्ने गरेको साथै उक्त नाबालिकाको आमा-बाबु र तिनका आफन्तहरूलाई नाबालिकाको अश्लील फोटो तथा भीडियो पठाएको थियो। उक्त युवकले नाबालिकाको अश्लील भीडियो तथा फोटोहरू सोशल मीडियामा भाइरल गरिदिने धम्की दिएपछि अन्ततः नाबालिकाले वाक्क-दिक्क भएर घटनाबारे परिवारका सदस्यहरूलाई विस्तृत रूपमा जानकारी गराइन्। यसपछि नाबालिकाको परिवारका सदस्यहरूले गत 11 अप्रेलमा सिलगढी मेट्रोपोलिटनको साइबर क्राइम थानामा घटनाबारे लिखित अभियोग दर्ता गरेपछि जाँचमा जुटेका पुलिसले मोबाइल नेटवर्कको सहयोगमा ती तीनजना युवकलाई गत राति नर्थ सिक्किमबाट पक्राउ गरेर सिलगढी ल्याए। साइबर क्राइम थाना पुलिसले पक्रा परेका 3 जना आरोपीलाई आज सिलगढी सीजीएम कोर्टमा पेश गरेपछि हिरासतमा लिएको छ।