नाबालिकासित अभद्र व्यवहार गरेको आरोपमा बीएसएफ-का कन्स्टेबल पक्राउ

सिलगढी : बीएसएफका एकजना कन्स्टेबललाई 13 वर्षीय नाबालिकासित अभद्र व्यवहार गरेको आरोपमा मतिगढा पुलिसले पक्राउ गरेको छ। पक्रा परेका कन्स्टेबल संजीव कुमार कदमतला बीएसएफ क्याम्पमा कन्स्टेबल पदमा कार्यरत थिए। प्राप्त जानकारी अनुसार गत 7 नोभेम्बरमा बीएसएफ कदमतला क्याम्पमा कार्यरत कन्स्टेबल संजीव कुमार र तिनका सहयोगीले 13 वर्षीय नाबालिकासित अभद्र व्यवहार गरेको एउटी महिलाले देखिन्। यसपछि उक्त महिलाले चिच्याएपछि ती दुईजना त्यहाँबाट भाग्दा तीमध्ये एकजनाको मोबाइल घटनास्थलमा झर्यो। अर्कोतिर, पीड़ित परिवारले घटनाको भोलिपल्ट मतिगढा थानामा लिखित अभियोग दर्ता गरेपछि अभियोगको आधारमा गत राति मतिगढा पुलिसले आरोपी बीएसएफका कन्स्टेबललाई पस्को एक्ट अन्तर्गत मामिला दर्ता गरेर पक्राउ गरेको छ। पक्रा परेका कन्स्टेबललाई आज सिलगढी अदालतमा पेश गरेपछि न्यायाधीशले आरोपीलाई न्यायिक हिरासतमा राख्ने निर्देश दिएको छ।