नक्सलबारीमा पिकअप भ्यानको चपेटमा परेर युवक गम्भीर घाइते

नक्सलबारी, 29 नोभेम्बर (निसं): पिकअप भ्यानको चपेटमा परेर एकजना युवक गम्भीर घाइते भएको छ। यो घटना नक्सलबारीको किलाराम जोत क्षेत्रमा घटेको हो। प्राप्त जानकारी अनुसार, आज युवक कल्भट नजिकै उभिएको थियो। त्यहि बेला नक्सलबारीतर्फ आउँदै गरेको एउटा पिकअप भ्यान अनियन्त्रित भएर कल्भटमा ठोक्किँदा युवकलाई पनि धक्का दिएर खेतमा पल्टेर रोकियो। यस घटनामा अनिल मल्लिक गम्भीर घाइते भएका छन्। पछि स्थानीय मानिसहरूले तुरुन्तै घाइते युवकलाई उद्धार गरेर नक्सलबारी अस्पताल पुऱ्याए, जहाँबाट युवकलाई बाघडुग्राको एउटा निजी अस्पतालमा भर्ना गरियो। खबर प्राप्त भएपछि नक्सलबारी थाना पुलिस घटनास्थलमा पुगेर पिकअप भ्यान चालकलाई नियन्त्रणमा लिइयो। पुलिसले उक्त पिकअप भ्यान जफत गर्नको साथै सम्पूर्ण घटनाको जाँच शुरू गरेको छ।