निर्दलीय प्रार्थी सुरज गुरुङले रिम्बिक लोधोमा क्षेत्रमा गरे चुनाउ प्रचार

बिजनबारी: दार्जिलिङ विधानसभा आसनका निर्दलीय प्रार्थी सुरज गुरुङ लगायत तिनको टोलीका सदस्यहरूले आज बिजनबारीको कैंजले हुँदै सिमावर्ती रिम्बिक लोधोमा क्षेत्रको परिभ्रमण गरेर चुनाउ प्रचार गरे। आज बिहानैदेखि उम्मेदवार गुरुङले कैजले बजारमा स्थानीय मानिसहरुसित भलाकुसारी गरेपछि तिनी सोझै रिम्बिक-लोधोमा क्षेत्रको भ्रमणमा गए। त्यहाँ लोधोमा रिम्बिक लगायत अन्य ठाउँहरूमा आफ्नो पक्षमा मतदान गर्ने सबैसित अपील गरे। आजको चुनाउ प्रचार अवधि निर्दलीय उम्मेदवार सुरज गुरुङको साथमा संजीव गोर्खा लामा लगायत केही युवाहरू थिए। विशेष युवाहरूलाई जागरूक हुने आह्वान गर्दै पहाडको खस्किँदो राजनीतिको गरिमालाई पुन: फर्काउन अनि आफ्नो संवैधानिक मागप्रति जनताको भरोसा कायम राख्ने प्रयास गर्दै आफुहरू हिड्दैछौ भनी उम्मेदवार सुरज गुरुङले बताए।