पैह्रोले गर्दा 3 दिनदेखि बिजनबारी सिङला रोड बन्द

बिजनबारी : गत तीन-चार दिनदेखि लगातार परिरहेको पानीले गर्दा गोक नजिक सुनसरी वस्तीमा माथिबाट झरेको भीषण पैह्रोको कारण तीन दिनदेखि बिजनबारी सिङला रोड पूर्णरूपले अवरोध बनेपछि यातायात ठप्प बन्न पुगेको छ। उक्त रोडमा जताततै पैह्रो आएको कारण धेरैवटा बिजुलीको खाम्बाहरू पनि उखेलिएको कारण क्षेत्रका मानिसहरूलाई यातायत मात्र नभएर बिजुली बत्तीको पनि ठुलो समस्या आइपरेको गोजमुमो पुल बिजनबारी गोक समष्टि 23/57 बुथ सभापति राजकुमार लामाले जनाएका छन्। पैह्रोको चपेटामा आएका भलायो डाँड़ा गाउँवासीहरूलाई अन्य ठाउँमा सारिएको साथै यसबारे पार्टी प्रमुखहरू लगायत सम्बन्धित विभागहरूलाई सूचना गराइसकेको तिनले थप जानकारी दिएका छन्। यद्धपि, हालसम्म यसबारे उचित पहल नभएको बताउँदै क्षेत्रवासीको दैनिक समस्यालाई ध्यानमा राखेर चाँड़ै पहल गरिदिने तिनले अनुरोध गरेका छन्। हालै सामुने रोड पनि अवरोध अवस्थामा रहेको जानकारी प्राप्त भएको छ।