प्रशासक गौतम देवसित भेट गरे एसजेडीए चेयरम्यान सौरभ चक्रवर्तीले

सिलगढी : एसजेडीए चेयरम्यानको पदभार सम्हालेपछि सौरभ चक्रवर्तीले आज सिलगढी नगरनिगमका प्रशासक गौतम देवसित भेट गरे। भेट अवधि तिनले नगरनिगमको बोर्डसित मिलेर विविध विकासमूलक कार्य गर्ने साथै सिलगढी तथा जलपाईगढीमा रहेको अधुरो कार्यहरूप्रति विशेष जोड दिइने तिनले बताए। एका-अर्कामाथि सामञ्जस्य बनाइ राखेर सिलगढीमा विकासको गति कायम राख्दै कार्य गर्ने तिनले बताए। अर्कोतिर, गौतम देवले सहरमा जामको समस्या लगायत सिलगढीमा चलिरहेको विकासको कार्यमा एसजेडीए समान रूपमा सामेल रहेको बताए। सौरभ चक्रवर्ती एसजेडीएको नयाँ चेयरम्यान नियुक्त भएपछि अब सहरमा विकास कार्यको गति अझ बढ्नेछ भनी तिनले बताए। यस अवसरमा एसजेडीए बोर्डका सदस्य रामभजन महतो, मानिक दे लगायत अन्य सदस्यहरू उपस्थित थिए।