प्रार्थी पीटी ओलाको समर्थनमा गोजमुमो पोख्रेबुङ चामोङ समष्टिले घर-दैलो अभियान चलाउने

सुकेपोखरी : आगामी विधानसभा चुनाउलाई केन्द्र गरेर गोर्खा जनमुक्ति युवा मोर्चा पोख्रेबुङ चामोङ 15 नम्बर समष्टिको सभा आज सम्पन्न भयो। पार्टी प्रमुख भाष्कर मुखियाले पत्रकार सम्मेलन गरेर युवा मोर्चाको रणनीतिबारे विस्तृत जानकारी दिए। तिनले दिएको जानकारी अनुसार उक्त सभामा समष्टि अधीनस्थ रहेको युवा मोर्चाको सम्पूर्ण 10 वटा शाखाले भोलि अर्थात् शनिबारदेखि घर दैलो अभियान चलाउने निर्णय लिएको बताए। तिनले गोजमुमो अध्यक्ष बिमल गुरूङ तथा विनय तामाङको प्रशासनिक सञ्चालन प्रक्रियामा धेरै फरक रहेको बताए। आफू आठ महिनासम्म जेल बस्नु परेको साथै विस्थापित जीवन व्यतित गर्नु परे तापनि माटो, अस्तित्व र चिन्हारीको निम्ति उदय भएको पार्टीप्रतिको आस्था र विश्वासको कारण नै पार्टी नछोडेको तिनले स्पष्ट पारे। तिनले आगामी चुनाउमा पार्टीका उम्मेद्वार पीटी ओलाको जीत निश्चित रहेको दावी गर्दै चुनाउ प्रचारमा समष्टि एवम् शाखा युवा मोर्चा डटेर लागिपर्ने बताए।