सभासद प्रणाम रसाईलीले अम्बटे क्षेत्रको गरे भ्रमण

खरसाङ (निसं) : जीटीए अन्तर्गत (आरई) पावर डिपार्टमेन्टद्वारा खरसाङ खण्ड अन्तर्गत अम्बटेको सिरिसेमा बिजुली बत्तीको नयाँ लाईन जडानको काम भ‌इरहेको छ। आरई डिपार्टमेन्टको कार्यकारिणी अभियन्ता सुरज थापाको विशेष पहलमा यो कार्य भ‌इरहेको जानकारी प्राप्त भएको छ। यस कार्यको थालनी भएकोमा गाउँवासीले जीटीए मुख्य कार्यपाल अनित थापा अनि सभासद प्रणाम रसाईलीलाई धन्यवाद ज्ञापन गरेका छन्। पानीको पम्प बिजुली करेन्टको असुविधाले गर्दा प्रयोगमा आउन असुविधाको सामना गर्न परिरहेको थियो। मनोनित सभासद प्रणाम रसाईलीले आज अम्बटे क्षेत्रको भ्रमण गरेका थिए। यस भ्रमण अवधि अम्बटेको सिरिरे समाजको सभापति सुरेन छेत्री,पानी कमिटीको सभापति मणि नारायण प्रधान ,आरई डिपार्टमेन्टको सहायक अभियन्ता अरुण प्रधान अनि खरसाङ टाउन कमिटी सह-सचिव बीरबल पाखरीन उपस्थित थिए। यस अवधि पावर विभागको एमओडी सभासद प्रणाम रसाइलीले पत्रकारहरूसित कुराकानी गर्दै यसबारेमा विस्तृत जानकारी गराएका छन् ।