स्कूल बसले स्कुटीलाई धक्का दिँदा बाबु-छोरा घाइते

सिलगढी, 24 जनवरी: आज बिहानै सिलगढीको हाकिमपाडा स्वामीजी मोडमा एउटा स्कूल बसले स्कुटीलाई धक्का दिँदा 5 वर्षीय नानी र उसको बाबु घाइते भए। प्राप्त जानकारी अनुसार, सिलगढीको 14 नम्बर वार्डका वासिन्दा अर्जुन हेले आफ्नो पाँच वर्षीय नानीसँग स्कुटीमा घर फर्किँदै थिए। त्यहीं समय स्वामीजी मोडमा एउटा स्कूल बसले स्कुटीलाई धक्का दियो। उक्त घटनामा सानो नानी र उनका बाबु गम्भीर घाइते भए। यसपछि तुरुन्तै उनीहरूलाई घटनास्थलबाट उद्धार गरेर सिलगढी जिल्ला अस्पतालमा पठाइयो।
अर्जुन हेले, सिलगढी नगर निगमका सफाइ कर्मी हुन्। यसैबीच, घटनाको खबर पाएर पानीट्याङ्की आउटपोस्ट पुलिस घटनास्थलमा आइपुगे अनि बस चालकलाईसहित बसलाई नियन्त्रणमा लिएर पुलिस थानामा लिएर गए। पुलिसले हाल सम्पूर्ण घटनाको जाँच गरिरहेको छ।