सिलगढीबाट 5 वर्षदेखि निखोज भएकी महिला उद्धार, यथार्थ थाहा पाएपछि परिवारका सदस्य स्तब्ध

सिलगढी : गत 5 वर्षदेखि ससुरालीबाट निखोज भएकी महिलाको कुनै पत्तो लागेको थिएन। अन्ततः ‘दिदी के बलो’ मार्फत् फोन गरेपछि उक्त महिलालाई उद्धार गरेको छ। तर घटनाको सत्यता थाहापछि परिवारका सदस्यहरू अचम्भित बनेका छन्। प्राप्त जानकारी अनुसार 2019 सालमा उक्त महिला निखोज भएकी थिइन्। सिलगढीको एनजेपी थाना अन्तर्गत शान्तिनगर निवासी उक्त महिला निखोज भएपछि तिनको भाइले जुलाई महिनामा ‘दिदी के बलो’-मा अभियोग गरेपछि जाँचमा जुटेका एनजेपी थाना पुलिसले उक्त महिलालाई उद्धार गरेको छ। उक्त महिलाले लोग्ने तथा नानीलाई छोडेर ससुरालीबाट भागेर अन्य एकजना व्यक्तिसित बिहे गरेर नदियामा संसार चलाइरहेकी थिइन्। तिनको एउटा सन्तान पनि रहेको छ। ब्याङ्क एकाउन्टको माध्यमद्वारा पुलिसले हिजो नदियाबाट उक्त महिलालाई उद्धार गरेपछि सिलगढी ल्याइएको बताइएको छ।