सिलगढी जिल्ला अस्पतालमा लिफ्ट र लेप्रोस्कोपी मसिनको मेयरद्वारा उद्घाटन

सिलगढी : सिलगढी जिल्ला अस्पताललाई नयाँ रूपमा सजाउन रोगी कल्याण समितिका चेयरम्यान तथा सिलगढी नगरनिगमका मेयर गौतम देव तत्पर छन्। आज सिलगढी जिल्ला अस्पतालमा लिफ्ट र लेप्रोस्कोपी मसिनको मेयर गौतम देवले विधिवत् रूपमा उद्घाटन गरे। यसपछि अस्पतालमा रोगी कल्याण समितिको एउटा बैठक सम्पन्न भयो। बैठकको अन्तमा मेयरले भने, अस्पताललाई नयाँ रूपमा सजाउनको लागि विविध कार्य शुरू गरिएको छ। आज लिफ्ट र लेप्रोस्कोपी मसिनको उद्घाटन गरियो। यसले गर्दा रोगीहरूलाई निक्कै सुविधा हुनेछ। यसबाहेक आजको बैठकमा अस्पतालको विकासको लागि शुरू गरिएको विभिन्न कार्यको प्रगतिको बारेमा छलफल गरियो।