सिलगढीको कोभिड हस्पिटलमा अतिरिक्त प्रभार सम्हाले डा. प्रशान्त बराइलीले

मिरिक : मिरिक निवासी डा. प्रशान्त बराइलीले सिलगढीको मतिगढास्थित कोभिड हस्पिटलमा अतिरिक्त प्रभार सम्हालेका छन्, जो पहाडवासीको निम्ति गर्वको विषय बनेको छ। डाक्टर बराइली दार्जिलिङ सिङ्गताम प्राथमिक स्वस्थ्य केन्द्रका डाक्टर इन्चार्ज हुन्। मिरिक बस्ती निवासी एवं नेपाली उपन्यासकार गणेश बराइली अनि माता लिना बराइलीको सुपुत्र प्रशान्तले मिरिक अरेन्ज लेक स्कुलबाट प्राथमिक शिक्षा आरम्भ गरेका थिए भने कालेबुङको सन्त अगस्टिन स्कुलबाट उच्च शिक्षा हासिल गरेपछि उक्रेन देशमा मेडिकल बिषयमा एमबीबीएस-को अध्ययन गरे। त्यसपछि भारत फर्किएर तिनले कोलकाताको रामकृष्ण मिशनमा सेवा पुर्याए। यसरी नै नयाँ दिल्लीस्थित एम्स हस्पिटलको आपतकालीन विभागमा जुनियर डाक्टरको रुपमा पनि तिनले कार्य गरिसकेका छन्। तिनले आफ्नो धैर्य अनि लगनशीलतालाई आत्मसात् गरेर पश्चिम् बङ्गाल राज्यका आम-मानिसहरुको निम्ति सेवा पुर्याउँदै आजको युवा पीडिको निम्ति तिनी एकजना प्रेरणाको श्रोत बन्न पुगेका छन्।