सिलगढीको राजीव नगर इलाकाबाट 5 जना बदमाश पक्राउ

सिलगढी, 15 नोभेम्बर (निसं): सिलगढी प्रधाननगर पुलिसले आपराधिक गतिविधि गर्ने उद्देश्यले भेला भएका पाँच जना बदमाशलाई पक्राउ गरेको छ। पक्रा परेका आरोपीहरूको नाम पंकज राय, सागर मंगर, असीम छेत्री, आयुष खाती र अनमोल प्रधान रहेको छ। यी मध्ये पंकज राय एकजना कुख्यात अपराधी हुन्। पंकज प्रधाननगर थाना क्षेत्रको निवासी हुन् भने अन्य सबै दार्जिलिङ निवासी बताइएको छ।
बिहीबार राति 46 नम्बर वार्डको राजीवनगर क्षेत्रमा आपराधिक गतिविधि गर्ने उद्देश्यले केही बदमाशहरू भेला भएको पुलिसले गोप्य सूचना पाएपछि त्यहाँ छापामार अभियान चलाउँदा कुख्यात अपराधी पंकज रायसहित पाँच जना पक्रा परेका हुन्। तथापि, रातको फाइदा उठाएर केही अन्य बदमाशहरू घटनास्थलबाट भाग्न सफल भए। आरोपीहरूबाट पुलिसले डकैतीमा प्रयोग हुने विभिन्न सामग्रीहरू उद्धार गरिएको बताइएको छ।
पुलिस सूत्र अनुसार, पक्रा पर्ने पंकज रायलाई पहिला पनि मादक पदार्थ सम्बन्धी घटनामा पुलिसले पक्राउ गरेको थियो भने तिनलाई धेरै समयसम्म सुधारगृहमा राखिएको थियो। सुधारगृहबाट बाहिरिएपछि उनले पुनः अपराध गर्न सुरु गरेको बताइएको छ। आज पाँचै जनालाई सिलगढी अदालतमा पेश गरियो। पुलिसले यस घटनाको विस्तृत छानबिन शुरू गरेको छ।