सिलगढीमा घरमा पसेर वृद्ध महिलाको सुनको चेन थुतेर चम्पट कसे बदमाश

सिलगढी, 31 दिसम्बर (निसं): एकजना बदमाशले घरमा पसेर वृद्ध महिलाको गलाबाट सुनको चेन थुतेर चम्पट कसेको घटना प्रकाशमा आएको छ। यस घटनाले सिलगढीको लेकटाउन इलाकामा सनसनी फैलिएको छ। प्राप्त जानकारी अनुसार, लेकटाउनको महाशक्तिकाली बाडी इलाकामा बसोबास गर्ने बेलारानी दे बिहान नुहाउनका लागि बाथरूममा गएकी थिइन्। महिलाले ढोका अलिक खुलेर पानी भर्न थालिन्। त्यसै क्रममा एकजना बदमाश घरमा पसेर उनको गलाबाट सुनको चेन थुतेर चम्पट कसे। घटनापछि क्षेत्रमा सनसनी फैलिएको छ। पछि एनजेपी आउटपोस्ट पुलिस थानामा उजुरी दर्ता गरिएको छ। पुलिसले सम्पूर्ण घटनाको जाँच गरिरहेको छ। वृद्ध महिलाले भनिन्, चोरले मेरो गलाबाट सुनको चेन थुतेर पर्खाल नाघेर भाग्यो। त्यसलाई पछ्याउँदा पनि चोर भागी हाल्यो। उक्त बदमाशले टाउकोमा टोपी र अनुहारमा माक्स लगाएको थियो। उक्त घटनापछि वृद्ध महिला डराएकी छन्।