सिलगढी महकुमा परिषदको बजेट प्रस्तुत, महकुमा परिषदले 130 करोड रुपियाँको काम गर्ने

सिलगढी, 4 मार्च (निसं): सिलगढी महकुमा परिषदको बजेट आज सभाकक्षमा प्रस्तुत गरियो। यस क्रममा सिलगढी महकुमा परिषदका सभाध्यक्ष अरुण घोष, सहायक अध्यक्ष रोमा रेशमी एक्का, सिलगढी महकुमा परिषदका सचिव युटन शेर्पा लगायत अन्य व्यक्तिहरू उपस्थित थिए। आजको बजेट सत्रपछि महकुमा परिषदका सभाध्यक्ष अरुण घोषले भने, 2025-26 का लागि 130 करोड रुपियाँको बजेट तय गरिएको छ। मुख्य रूपमा सिलगढी महकुमा परिषदले शिक्षा, स्वास्थ्य र सौन्दर्यकरणमा विशेष काम गर्नेछ। यसको साथै, गाउँ क्षेत्रहरूको विकास पनि गरिनेछ। बजेटमा खेलकुदमा फोकस गरिएको छ। महकुमा परिषदको अधीनमा विभिन्न क्षेत्रमा साना इनडोर स्टेडियमहरू पनि निर्माण गरिनेछ, जहाँ स्विमिङ, जिम र खेलकुद जस्ता थुप्रै सुविधाहरू उपलब्ध हुनेछन्। गत वर्षको बजेट 131 करोड रुपियाँ थियो, तर यस वर्ष 1 करोड रुपियाँको कमी आएको छ। यो यसकारण हो कि केन्द्र सरकारका धेरै योजनाहरूको लागि राज्य सरकारलाई रकम प्राप्त भइरहेको छैन, जसका कारण राज्य सरकार र सिलगढी महकुमा परिषद लगभग करोडौं रुपियाँबाट वञ्चित भएको छ। यसको असर यस वर्षको महकुमा परिषदको बजेटमा देखिएको छ।