सिलगढी (निसं): सिलगढी थाना पुलिसले सादा पोशाकमा लुगा चोरी गरेको आरोपमा 3 जनालाई पक्राउ गरेको छ। पक्रा पर्नेहरूमा जयन्त राय, मोहम्मद जावेद र बप्पा मन्नाको रूपमा चिन्हित गरेको छ। आरोपीहरू फुलेश्वरी अनि कोयला डिपो इलाका निवासी हुन्।
प्राप्त जानकारी अनुसार, शुक्रवार सिलगढी थाना अन्तर्गत हकर कर्नर मार्केटमा एउटा दोकान अघिबाट तीनजना युवकले लुगाको ब्याग चोरी गरेर चम्पट कसेका थिए। घटना पछि सिलगढी थानामा लिखित अभियोग दर्ता गरेपछि अभियोगको आधारमा पुलिसले गत राति बर्दवान रोड फ्लाईओभर मुनिबाट तीन जनालाई पक्राउ गरेको छ। यसको साथै पुलिसले आरोपीहरूबाट चोरी गरेको लुगाको ब्याग पनि उद्धार गरेको छ। उक्त ब्यागमा 30 वटा ज्याकेट अनि 6 वटा शर्ट थियो।
पुलिस सूत्र अनुसार पक्रा पर्नेहरू सबै पुरानो अपराधी हुन्। पूजा आइरहेकोले गर्दा व्यवसायीहरूले नयाँ लुगाको अर्डर दिएका थिए। लुगाको अर्डर बजारमा आएको थाहा पाएपछि मौका छोपेर तीन जनाले चोरी गरेका थिए। पक्रा परेका आरोपीहरूलाई आज सिलगढी अदालतमा पेश गरियो। पुलिसले सम्पूर्ण मामिलाको जाँच गरिरहेको छ।