सिलगढी (निसं): आगामी 2 जूनको साँझसम्म सिलगढी नगर निगम इलाकामा आपूर्ति गरिरहेको पानी पिउनको लागि योग्य नरहेको घोषणा गरेपछि शहरका मानिसहरू गत दुई दिनदेखि पानीको अभावमा परेका छन्। तथापि, उक्त समस्याको समाधान गर्नका लागि सिलगढी नगर निगम तत्पर रहेको छ। विभिन्न टाउँहरूमा पानीको ट्याङ्की साथै पिउने पानीको पाउच वितरण गरेर मानिसहरूको समस्यालाई समाधान गर्ने प्रयास गरिरहेको देखिन्छ। पानीको समस्यालाई समाधान गर्नका लागि सिलगढी नगर निगमको निर्देशमा पीएचई विभागको तर्फबाट सिलगढीको विभिन्न स्थानमा मोबाइल वाटर ट्रिटमेन्ट प्लान्ट लगाइएको छ। यसको माध्यमले शुद्ध पिउने पानीको पाउच बनाइँदैछ। साउथ शान्तिनगर इलाकामा उक्त प्लान्ट बिहिबार बिहानदेखि नै सुरू भइसकेको छ। यसैगरी, फूलबाड़ी, एक्तियासाल लगायत 6 ठाउँमा यस प्रकारको मोबाइल वाटर ट्रिटमेन्ट प्लान्ट तयार गरिएको छ। साउथ शान्तिनगर इलाकाको प्लान्टमा आज बिहानदेखि 40 हजार भन्दा अधिक पानीको पाउच तयार गरिसकेको छ। यी पानीको पाउचहरू सर्वप्रथम सिलगढीको विभिन्न बोरोमा लगिँदैछ अनि त्यहाँका मानिसहरूलाई वितरण गरिँदैछ।