सिलगढीमा ‘रन फर भारत’ 10 किलोमिटर म्याराथन दौड प्रतियोगिताको आयोजना

सिलगढी : भारत सरकारको संस्कृति मन्त्रालयको इन्स्टिट्युट अफ् सोशल एन्ड कल्चरल स्टडिजको पहलमा स्वाधीनताको अमृत महोत्सवको अवसरमा आज ‘रन फर भारत’ 10 किलोमिटर म्याराथन दौड प्रतियोगिताको आयोजना गरियो। युवा इन्डिया एवम् वनवासी कल्याण आश्रमको सहयोगमा उक्त म्याराथान दौड प्रतियोगिताको आयोजना गरिएको हो। आज बिहान उत्तरबंग विश्व विद्यालयको 2 नम्बर गेटबाट उक्त म्याराथान दौड शुरू गरेपछि सालबारीको वनवासी कल्याण आश्रममा पुगेर समापन गरियो। उक्त म्याराथान दौडमा सयौँको संख्यामा प्रतियोगीहरूले अंश ग्रहण गरेका थिए। पानी परे तापनि प्रतियोगीहरूमा उत्साह देखियो। उक्त प्रतियोगितामा प्रमुख अतिथिको रूपमा ओलम्पियन तथा अर्जुन पुरस्कार विजेता कविता राउत, इन्स्टिट्युट अफ् सोशल एन्ड कल्चरल स्टडिजका निर्देशक अरिन्दम मुखोपाध्याय, युवा भारत सदस्य शैलेश लगायत अन्य उपस्थित थिए। ‘रन फर भारत’ म्याराथान दौड पुरुष तथा महिला दुवै विभागका पहिलो, दोस्रो र तेस्रो स्थान हासिल गर्नेहरूलाई नगद राशि सहित ट्रफी प्रदान गरेर सम्मान जनाइयो। यसको साथै दशम स्थानसम्मका विजयी प्रतियोगीहरूलाई पुरस्कृत गरियो।