सिलगढीमा सामान्य विवाद हुँदा गोली चलाएको आरोपमा 2 जना पक्राउ

सिलगढी : सिलगढीको भक्ति नगर थाना अन्तर्गत इलाकामा दुई दिनअघि सामान्य विवाद हुँदा गोली चलाएको घटनामा पुलिसले 2 जनालाई पक्राउ गरेको छ। पक्रा परेकाहरू गौरव सूत्रधर र रतन घोषको रूपमा चिन्हित गरिएको छ। घटनाक्रमअनुसार गत 29 जुन अबेर राति गौरव चक्रवर्ती आफ्ना साथीसित कामबाट घर फर्किरहेको समय भक्तिनगर थाना अन्तर्गत खाई खाई बजार नजिक गौरव चक्रवर्ती र गौरव सूत्रधरबीच विवाद शुरू भयो। यसपछि गौरव सूत्रधरले गोली चलाउँदा गौरव चक्रवर्तीको ढाँडमा लागेपछि घाइते अवस्थामा तिनलाई उद्धार गरेर सेभोक रोडस्थित गैर सरकारी अस्पतालमा भर्ना गरेपछि हाल तिनी उपचाराधीन अवस्थामा छन्। घटनापछि भक्तिनगर थानामा लिखित अभियोग दर्ता गरेपछि अभियोगको आधारमा जाँचमा जुटेका पुलिसले गत राति गौरव सूत्रधरलाई पक्राउ गरेर सोधखोज गरेपछि फकदईबारी इलाकाबाट रतन घोषलाई पक्राउ गरेको छ। यसको साथै पुलिसले रतनको घरबाट पिस्तोल र दुई  राउन्ड जिउँदो कार्तुस पनि उद्धार गरेको छ। भक्तिनगर थाना पुलिसले दुवै आरोपीविरुद्ध गैर-कानुनी रूपमा पिस्तोल राखेको, हत्याको प्रयास गरेको मामिला दर्ता गरेर आज अदालतमा पेश गरेपछि पुलिस हिरासतमा पठाएको छ। पुलिसले घटनाको जाँच सुरू गरेको छ।