सिलगढी नगरनिगमको उपेक्षा गरेर एसजेडीए-ले कुनै निर्णय लिन सक्दैन : अशोक भट्टाचार्य

सिलगढी : सिलगढी नगरनिगमको उपेक्षा गरेर एसजेडीए-ले कुनै प्रकारको निर्णय लिन सक्दैन भनी नगरनिगम प्रशासक बोर्डका चेयरम्यान अशोक भट्टाचार्यले पत्रकारहरूसित कुराकानी गर्दै यस प्रकारको मन्तव्य पोखेका छन्। यसको साथै तिनले एसजेडीए-को केही कार्यहरूको विरोध गर्दै एसजेडीए चेयरम्यान विजय चन्द्र बर्मनलाई एउटा पत्राचार समेत गरेका छन्। उल्लेखनीय छ, एसजेडीए-ले गत केही दिनदेखि सिलगढीको विधान मार्केटमा गरिएको अवैध निर्माणलाई लिएर आवाज उठाउनको साथै अवैध निर्माणलाई भत्काउनको लागि मन्त्रीदेखि लिएर एसजेडीएका चेयरम्यानले धेरैपल्ट व्यवसासीहरूसित बैठक पनि गरिसकेको बताइएको छ। अर्कोतिर, एसजेडीए-का केही कार्यहरूको विरोध गर्दै अशोक भट्टाचार्यले आवाज उठाएका छन्। तिनले बताएअनुसार एसजेडीए-ले विधान मार्केटको समस्याको समाधान गर्नको साटो उल्टै जटिल बनाइरहेको छ। सिलगढी नगरनिगमले विधान मार्केटबाट भाडा लिने गर्दछ। यसको साथै विधान मार्केटको हेरचाहको सबै जिम्मेवारी पनि नगरनिगमकै रहे तापनि सिलगढी नगरनिगमलाई अँन्ध्यारोमा राखेर एसजेडीए-ले एक्लै काम गरिरहेको तिनले आरोप लगाए।