सिलगढी नगरनिगमले अभियान चलाएर सडक दखल मुक्त

सिलगढी : धेरै दिनदेखि हाइड्रेन सफा नगरिएको साथै सडक दखल गरेको अभियोग आएपछि आज सिलगढी नगरनिगमले उचित पाइला चालेको छ। सिलगढी नगरनिगमको प्रशासक मण्डलीका सदस्य रञ्जन सरकारले आज बिहान सिलगढी नगरनिगमको 39 नम्बर वार्डमा अवैध रूपमा दखल गरेर राखेको सडकहरूलाई दखलमुक्त गराए। रञ्जन सरकार लगायत नगरनिगमका अन्य अधिकारीहरू, तृणमूल वार्ड को-अर्डिनेटर प्रदीप गोयल, दुलाल दत्त एवम् अन्यले आज स्वामीजी मोड नजिक पुगेर एउटा सडकलाई दखलमुक्त गराए। यस अवसरमा रञ्जन सरकारले बताएअनुसार सिलगढी सहरको कुनै पनि ठाउँमा सडक दखल गर्न पाउने छैन। धेरै दिनदेखि यहाँको हाइड्रेनहरूको सफाई गरिएको छैन साथै धेरैजसो ठाउँमा घर निर्माण गर्नको लागि ल्याइएको सामग्रीहरू सडकमै राख्ने गरेको तिनले बताए। यहाँ अवैध रूपमा सडक दखल गरेकोले आज अभियान चलाएर उक्त सडकलाई दखलमुक्त गराएको तिनले बताए।