सिलगढी एसएफ रोडमा अग्नीकाण्ड, 3 वटा दोकान जलेर भष्म

सिलगढी, 14 नोभेम्बर (निसं): सिलगढीको एसएफ रोडमा भयङ्कर आगलागी भएको छ, जसमा तीन वटा दोकान जलेर खरानी भएको छ। बुधबार राति घटेको यस आगलागीको कारण इलाकामा हङ्गामा मच्चिएको छ। स्थानीय मानिसहरूले बताए अनुसार, गत राति 2 बजेको समयमा ठूलो आवाज सुनेपछि दोकानबाट आगोको ज्वाला देखा परेको थियो। बीरयानी दोकानमा ग्यास सिलिन्डर विस्फोट भएर आगो लागेको बताइएको छ।
घटनाको सूचना पाउनसाथ पुलिस अनि दमकल विभागको तीन वटा गाडी घटनास्थलमा पुगेर धेरै समयसम्मको प्रयासपछि आगोलाई नियन्त्रणमा ल्याइयो। उक्त आगलागीमा बिरयानी, फर्निचरका साथै अर्को एउटा दोकान पनि जलेर खरानी भएको छ। यद्यपि, यस आगलागीमा कुनै पनि मानवीय क्षति नभएको जानकारी प्राप्त भएको छ। दमकल विभागले आगलागीको कारण जाँच गरिरहेको छ।