स्वर्ण व्यवसायीले कुदिरहेको ट्रेन अघि हाम फालेर गरे आत्महत्या

अलिपुरद्वार: अलिपुरद्वारको बडोबजार इलाकामा एकजना स्वर्ण व्यवसायीले रेलवे लाइनमा हाम फालेर आत्महत्या गरेको घटना प्रकाशमा आएको छ।  मृतक व्यक्ति अलिपुरद्वार नगरपालिकाको 10 नम्बर वार्ड निवासी गौतम कर्माकर (58)-को रूपमा चिन्हित गरिएको छ। स्थानीय सूत्रले दिएको जानकारी अनुसार आज अपरान्ह स्वर्ण व्यवसायी गौतम कर्मकारले अलिपुरद्वारको बडोबजार संलग्न रेलवे लाइनमा ट्रेन अघि हाम फालेर आत्महत्या गरेको बताइएको छ। धेरै समयदेखि व्यवसायको कारण आर्थिक समस्यासित जुझिरहेकोले गर्दा तिनी डिप्रेसनमा थिए। यसैले आज गौतम कर्मकारले अप बामन हाट प्यासेन्जर ट्रेन अघि हाम फालेर आत्महत्या गरेको बताइएको छ। पुलिसले शव उद्धार गरेर पोस्टमार्टमको लागि अलिपुरद्वार जिल्ला अस्पतालमा पठाएको छ। घटनाको खबर पाएर मृतकको परिवारका सदस्यहरू पनि घटनास्थलमा पुगेका थिए। उक्त घटनाले इलाकामा शोकको लहर छाएको छ।