तीनधारे: तीनधारे 17 माइल निवासी प्रवीण सुब्बाको घरमा आगलागी हुँदा घर जलेर खरानी भएको छ। प्राप्त जानकारी अनुसार तीनधारे 17 माइल निवासी प्रवीण सुब्बाको घरमा कोही नभएको समय उक्त आगलागी हुँदा घर लगायत घरमा रहेको सबै सर-समानहरू जलेर खरानी भएको बताइएको छ। आगलागीबारे अग्निशमन विभागलाई खबर दिए तापनि दमकल कर्मीहरू समयमा घटनास्थलमा नआएपछि गाउँलेहरूको सहयोगमा आगोलाई नियन्त्रणमा ल्याइयो।
के कारणले गर्दा उक्त आगलागी भएको हो भन्ने विषयमा थाहा लागेको छैन। तीनधारेमा अग्निशमन विभाग नरहेकोले गर्दा खरसाङबाट दमकल कर्मीहरू बोलाउन पर्ने अवस्था रहेको छ। यस्तो परिस्थितिमा कुनै पनि समय अप्रिय घटना हुनसक्ने आशंका रहेकोले गाउँलेहरूले तीनधारे क्षेत्रमा पनि दमकल विभागको व्यवस्था गरिनुपर्ने माग गरेका छन्।