बीएसएफ जवानको घर आइरहेको समय अस्वास्थ्य भएर मृत्यु, सैन्य सम्मानको साथ अन्तिम संस्कार

अलीपुरद्वार, 7 जनवरी (निसं): छुट्टीमा घर फर्किरहेका एकजना बीएसएफ जवानको बीच बाटोमा नै अचानक स्वास्थ्य बिग्रिएर मृत्यु भएको छ। उनको मृत्यु पछि कालचिनी ब्लकको निमतीझोडा चिया बगानमा शोकको माहौल फैलिएको छ। मृत जवानको नाम अभिषेक उराव (23) हो। स्थानीय मानिसहरूले बताए अनुसार, अभिषेक उराव जम्मू-कश्मीरमा बीएसएफको कन्स्टेबल पदमा कार्यरत थिए। अभिषेक आइतवार छुट्टीमा ट्रेनबाट घर फर्किरहेका थिए। बिहारको बरुनी क्षेत्रमा आपुग्दा अचानक उनको स्वास्थ्य बिग्रियो। त्यसपछि उनलाई ट्रेनबाट उतारेर नजिकको अस्पतालमा लगियो, जहाँ डाक्टरले उनलाई मृत घोषित गरे। सोमबार बिहान जवानको परिवारलाई यो खबर प्राप्त भयो। आज बिहान उनको पार्थिव शरीर निमतीझोडा चिया बगानस्थित उनका घरमा पुऱ्याइयो।
जवान अभिषेकको शव उनको पैतृक गाउँ पुग्न साथ सबैजना रोइरहेका थिए। जवान अभिषेकको शवको अन्तिम संस्कार मङ्गलबार सैन्य सम्मानको साथ उनको पैतृक गाउँमा गरियो। बीएसएफका जवानहरूले उनलाई बन्दूकको सलामी दिए। शवको अन्तिम दर्शन गर्नको लागि वरिपरीको गाउँहरूका मानिसहरू पनि पुगेका थिए। जानकारी अनुसार, अभिषेककी आमा चिया बगानमा श्रमिक हुन् भने उनका पिता दैनिक मजदुर हुन्। मृतक जवानका परिवारले बताए अनुसार उनले आफ्ना छोरालाई राम्ररी पढाएका थिए र एक वर्ष अघि मात्र उनले बीएसएफ-मा काम पाएका थिए। छोराको मृत्यु पछि उनका बाबा-आमालाई निक्कै पीडा परेको छ।