सिलगढी (निसं): राष्ट्रीय काङ्ग्रेसको 138 औं स्थापना दिवस आज देशका विभिन्न ठाउँहरू लगायत सिलगढीमा पनि मनाइयो। सिलगढीको हासमी चौकस्थित काङ्ग्रेस पार्टीको जिल्ला कार्यालयमा आज एउटा समारोहपूर्वक स्थापना दिवस पालन गरियो। यस अवसरमा जिल्ला काङ्ग्रेस अध्यक्ष शंकर मालाकारले काङ्ग्रेस पार्टीको झन्डा फर्फराए। पार्टीको स्थापना दिवस कार्यक्रममा युवा नेता शाहनवाज हुसैन, रोहित तिवारी, जीवन मजूमदार, राजेश यादव, तपन पाइन, सदानन्द दास, गोपाल सरकार, रूमा नाथ आदि प्रमुख रूपमा उपस्थित थिए। कार्यक्रमलाई सम्बोधन गर्दै पार्टीको जिल्ला अध्यक्ष शंकर मालाकारले भने, भारतको इतिहास नै काङ्ग्रेसको इतिहास हो। देशको विकासमा सम्पूर्ण योगदान काङ्ग्रेसको रहेको छ। काङ्ग्रेसका वीर योद्धाहरूको कारणले गर्दा नै देश स्वाधीन भएको हो तर वर्तमान सरकारले भारतलाई फेरि गुलाम बनाइदिएको छ। आज राहुल गाँधीले देशलाई बचाउनको लागि ‘भारत जोड़ो यात्रा’ गरिरहेका छन् तर तिनलाई रोक्नका लागि विभिन्न प्रयासहरू भइरहेको तिनले बताए। तथापि साधरण मानिसहरूले आफुहरू राहुल गाँधीको साथमा रहेको कुरा प्रत्यक्ष देखाइदिएको तिनले अझ बताए।