4 जना बदमास मतिगढाबाट हतियार सहित पक्राउ

सिलगढी, 25 दिसम्बर (निसं): मतिगढा थाना पुलिसले डकैतीको योजना बनाइरहेका चार जना बदमासलाई थाना क्षेत्र अन्तर्गत हिमूल संलग्न इलाकाको एउटा खाली क्वार्टरबाट पक्राउ गरेको छ। पक्रा परेका बदमासहरूको नाम संजीव दास (21), एमडी बप्पा (22), उत्तम साहनी (28) र पोरी दास (36) हो। पुलिसले बदमासहरूबाट हतियार पनि उद्धार गरेको छ। पुलिस सूत्र अनुसार, हिजो राति चारै जना बदमास आफ्ना साथीहरूसँग हिमूलको सुनसान स्थानमा भेला भएर ठूलो आपराधिक कार्य गर्ने योजना बनाइरहेका थिए। उनीहरूको योजना पूरा हुनु अगावै मतिगढा थाना पुलिसले अभियान चलाएर चार जना बदमासलाई पक्राउ गर्यो। यद्यपि यस क्रममा केही बदमासहरू भाग्न सफल भएका छन्। पक्रा परेका चार जना बदमास पुलिसको रेकर्डमा दागी अपराधी हुन्। पक्रा परेका चार जना बदमासलाई आज सिलगढी अदालतमा पेश गरियो। पुलिसले अहिले यी ग्रूपका भागेका अन्य सदस्यहरूको खोजी गरिरहेको छ।