5 दिनदेखि निखोज फुलबारीका युवक, परिवार चिन्तामा

फुलबारी : फुलबारी निवासी एकजना युवक 5 दिनदेखि निखोज रहेकोले परिवारका सदस्यहरू चिन्तित छन्। फुलबारी 2 नम्बर ग्राम पञ्चायतको पश्चिम धनतला निवासी 28 वर्षीय हबिबुर रहमान मण्डल गत 16 नोभेम्बरदेखि निखोज छन्। परिवारका सदस्यहरूले गत 18 नोभेम्बरमा निखोज भएकोबारे न्यु जलपाईगढी थानामा अभियोग दर्ता गरे तापनि हालसम्म तिनको कुनै पत्तो लागेको छैन। परिवार सूत्रले दिएको जानकारी अनुसार लगभग 10 वर्षअघि बालुघाट निवासी हबिबुर रहमानको फुलबारी पश्चिम धनतला गाउँ निवासी मुक्तार अलीको छोरी तरिमा बानुसित बिहे भएको थियो। बिहेपछि तिनीहरू फुलबारीमा बस्दै आइरहेका थिए। हबिबुर पेशाले टोटो चालक हुन्। गत बिहिबार तिनी फुलबारी जान्छु भनेर घरबाट निस्केपछि घर फर्कि आएनन्। यसपछि तिनका परिवार सदस्यहरूले आफन्त लगायत यताउता तिनको खोजी गरे तापनि कुनै पत्तो नलागेपछि निखोज भएकोबारे न्यु जलपाईगढी थानामा अभियोग दर्ता गरेका थिए।