‘आमरा बंगाली’-का प्रार्थीको रूपमा चुनाउ लड्ने 65 वर्षीय हरेन्द्रनाथ रायले

राजगञ्ज : राजगञ्जका धारागछ गाउँ निवासी हरेन्द्रनाथ राय गत विधानसभा चुनाउमा 7 पल्ट पराजित भए तापनि हार मानेका छैनन्। 65 वर्षीय  हरेन्द्रनाथ राय ‘आमरा बंगाली‘–को उम्मेदवारको रूपमा फेरि आउँदो विधानसभा चुनाउ लड्न चाहन्छन्। चुनाउमा विजयी नभए तापनि पार्टीको विचारधारा र नीति साधारण मानिसहरूअघि पुर्‍याउने उद्देश्य लिएर यसपल्ट तिनी फेरि चुनाउ लड्न चाहन्छन्। पार्टीको आदर्शमा विश्वास राख्ने हरेन्द्रनाथ रायले केन्द्रमा भाजपा सरकार र राज्यमा तृणमूल सरकारले जनतासित गरेको धेरै वाचाहरू हालसम्म पुरा नगरेको बताए। देशमा बेरोजगारहरूको संख्या बढिरहेको छ भने कृषि आधारित उद्योग नष्ट भइरहेको छ। केही नेता तथा मन्त्रीहरूले राजनीतिलाई व्यवसाय बनाएर पार्टी परिवर्तन गरिरहेको बताउँदै आफूले चुनाउ जित्नु नै पर्छ भन्ने मनसाय राखेर चुनाउमा खडा नभएको जनाए। तिनले अझ भने, म चुनाउमा ओर्लिएर मानिसहरूलाई आदर्श र नीतिहरूको बारेमा जानकारी दिने गर्दछु।