अलिपुरद्वार जिल्ला स्वास्थ्य विभागद्वारा कोरोना तेस्रो लहरको रोकथाम गर्ने तयारी शुरू

अलिपुरद्वार : कोरोनाको दोस्रो लहरले हाल देशभरिकै मानिसहरू चिन्तित बनेका छन्। तथापि, हाल कोरोनाको दोस्रो लहरको संक्रमण केही कम्ती भए तापनि कोरोनाको तेस्रो लहर पुनः आउने सम्भावना रहेको छ। विशेषज्ञहरूको भनाइ अनुसार कोरोनाको तेस्रो लहरले नानीहरूलाई धेरै प्रभावित पार्न सक्ने खतरा रहेको छ। यसैलाई ध्यानमा राखेर अलिपुरद्वार जिल्ला स्वास्थ्य विभागले यसको रोकथामको लागि अगावै तयारी शुरू गरिसकेको छ। जिल्ला मुख्य स्वास्थ्य अधिकारी गिरीश चन्द्र बेराले बताएअनुसार जिल्लामा कोरोनाको दोस्रो लहरको प्रभाव हाल कम्ती हुँदै गए तापनि तेस्रो लहर नानीहरूको लागि चिन्ताजनक बन्ने सम्भावना रहेको छ। यसैले गर्दा जिल्ला अस्पताल, फालाकाटा र वीरपाड़ा अस्पतालमा सीसीयुको संख्या बढ़ाइएको छ। नानीहरूको वार्डमा बेडको संख्या र अक्सिजन प्लान्टको पनि व्यवस्था गरिने साथै यसबारे स्वास्थ्य विभागलाई प्रस्ताव पठाएको तिनले बताए।