सिलगढी : केन्द्रीय गृहमन्त्री अमित शाह भोलि बिहिबार सिलगढी आउने छन् भने सिलगढीको रेलवे इन्टिट्युट मैदानमा भाजपाद्वारा आयोजना गरिने जनसभालाई तिनले सम्बोधन गर्ने भएका छन्। यसैले आज दार्जिलिङका सांसद राजु विष्टले उक्त जनसभास्थलको तयारीको निरीक्षण गरे। यस अवसरमा तिनले भने, गृहमन्त्री भोलि बाघडुग्रा विमानअड्डामा आइपुगेपछि पार्टीको तर्फबाट तिनलाई भव्य स्वागत जनाइनेछ। हाल हिंसा, हत्या, दुष्कर्म आदि जस्ता घटनाहरू निक्कै बढ्दै गएकोले गर्दा यसबाट बङ्गाललाई रक्षा गर्ने उद्देश्य लिएर गृहमन्त्री अमित शाह भोलि सिलगढी परिभ्रमणमा आउने भएका छन्। गृहमन्त्री अमित शाह भोलि दिउँसो विमानमार्फत् बाघडुग्रा विमानअड्डामा ओर्लिएपछि त्यहाँबाट सोझै दार्जिलिङ मोडतर्फ प्रस्थान गर्नेछन्। दार्जिलिङ मोडमा रहेको तेन्जिङ नोर्गेको सालिगमा माल्यार्पण गरेपछि तिनी त्यहाँबाट सोझै नौकाघाट जानेछन्। नौकाघाटमा पञ्चानन बर्माको सालिगमा माल्यार्पण गरेपछि तिनले सिलगढीको रेलवे इन्टिट्युट मैदानमा सम्पन्न हुने भाजपाको जनसभामा अंश ग्रहण गर्नेछन्।