अयोध्या राम मन्दिरबाट ल्याइएको अक्षता-कलश खरसाङको गिद्धे मन्दिरमा स्थापना गरिने

खरसाङ (निसं): श्री राम जन्मभूमि अयोध्याको राम मन्दिरमा पूजीत दिव्य अक्षता-कलशको अंश भारतवर्षको प्रत्येक मठ-मन्दिरहरूमा घुमाउने कार्य निश्चित गरिएको थियो। यो दिव्य अक्षता-कलश सुकुना मन्दिर, तीनधारे, घैयाबारी, महानदी, गिद्धे हुँदै खरसाङमा ल्याइपुर्‍याएको छ। श्री राम जन्मभूमि तीर्थ क्षेत्र ट्रस्टले पठाएको यो कलश श्री राम जन्म शोभायात्रा आयोजक समितिले उक्त कलश हिजो सिलगढीको श्री गौड़िया मठबाट प्राप्त गरेको थियो। उक्त कलश खरसाङ शहरमा आइपुगेपछि सनातन धर्मावलम्बीहरूले यसलाई दर्शन गर्नको साथै भव्य स्वागत गरे। उक्त कलश सहर परिक्रमा गरेपछि यसलाई खरसाङको राम मन्दिरमा राखिएको छ। आगामी 22 दिसम्बरको दिन यो दिव्य अक्षता-कलशलाई प्राण-प्रतिष्ठा गरेपछि खरसाङ सहरको गिद्धे मन्दिरमा राखिने भएको छ।