बाघडुग्राको बेङडुबी सडकमा बाइक र अटो ठोक्किँदा महिलाको मृत्यु, 4 जना घाइते

बाघडुग्रा: बाघडुग्राको बेङडुबी सडकमा बाइक र अटो आपस्तमा ठोक्किँदा एउटी महिलाको मृत्यु भएको छ भने अन्य 4 जना घाइते भएका छन्। मृतक महिला 50 वर्षीय चमेली मेहरको रूपमा चिन्हित गरिएको छ। प्राप्त जानकारी अनुसार हिजो एउटै परिवारका 5 जना बाघडुग्राबाट अटोमा सवार भएर तिरहानातर्फ गइरहेको समय विपरीत दिशाबाट द्रुत गतिमा आइरहेको एउटा बाइकसित ठोक्किँदा अटो पल्टिँयो। उक्त घटनामा एकजना महिलाको मृत्यु भएको छ भने अन्य 4 जना घाइते भएको बताइएको छ। घाइतेहरूलाई उद्धार गरेर बाघडुग्रा प्राथमिक स्वास्थ्य केन्द्रमा लगिएको छ। अर्कोतिर, बाइक चालकले घटनास्थलबाट सुइँकुच्चा ठोकेको बताइएको छ। बाघडुग्रा थाना पुलिसले घटनाको जाँच शुरू गरेको छ।