बाघडुग्रामा सड़क दुर्घटनामा दुईजना घाइते

बाघडुग्रा : बाघडुग्राको सिङ्गीझोराको एशियन हाईवे-2 मा आज बिहान एउटा मालवाहक ट्रक अनियन्त्रित भएर दुर्घटनाग्रस्त हुँदा चालक र खलासी गम्भीर रूपमा घाइते भएका छन्। प्राप्त जानकारीअनुसार आज बिहान उक्त मालवाहक ट्रक नक्सलबारीदेखि सिलगढीतर्फ गइरहेको समय एशियन हाईवे-2 मा ट्रक अनियन्त्रित भएर डिभाइडरसित ठोक्किँदा चालक र खलासी गम्भीर रूपमा घाइते भएको बताइएको छ। घटनापछि घाइतेहरूलाई उद्धार गरेर बाघडुग्रा  प्राथमिक अस्पतालमा भर्ना गरिएको छ। घटनाको खबर पाएर बाघडुग्रा पुलिस घटनास्थलमा पुगेर दुर्घटनाग्रस्त ट्रकलाई उद्धार गर्नको साथै घटनाको जाँच शुरू गरेको पुलिस सूत्रले जनाएको छ।