बाघडुग्राको तिरहानामा हात्तीको आक्रमणमा एकजना सैनिक जवानको मृत्यु

बाघडुग्रा, 30 अक्टोबरः छुट्टीमा साथीहरूसँग घुम्न गएको समय हात्तीको आक्रमणमा परेर एकजना सैनिक जवानको मृत्यु भएको छ। मृतकको नाम कुशल छेत्री हो। उनी नागाल्याण्डमा गोर्खा रेजिमेन्टमा कार्यरत् थिए।
प्राप्त जानकारी अनुसार, मङ्गलबार कुशल छेत्री आफ्ना साथीहरूसँग घुम्न गएको समय बाघडुग्राको बालासन नदी नजिक तिरहाना जंगल क्षेत्रमा जंगली हात्तीले आक्रमण गर्दा तिनको मृत्यु भएको बताइएको छ। उक्त घटना पछि स्थानीय मानिसहरुले वनकर्मीलाई खबर गरेपछि बाघडुग्रा रेञ्जको एलीफेन्ट स्क्वाड अनि बाघडुग्रा थाना पुलिस घटनास्थलमा पुगे अनि सैनिक जवानको शव उद्धार गरे। यसपछि शवलाई पोस्टमर्टमको लागि उत्तर बङ्गाल मेडिकल कलेज एवं अस्पतालमा पठाइ दिएको छ। घटनापछि इलाकामा शोकको लहर छाएको छ। पुलिसले सम्पूर्ण घटनाको जाँच शुरू गरेको छ।