बाघमारा बस्ती गुम्बाको लामा स्याङदेन म्हेम्हेको 100 वर्षको जन्म दिन पालन गरिने

खरसाङ (निसं): तीनधारे महानदी समष्टिको बाघमारा बस्तीमा अवस्थित ज्याङ्तेर सामतालिङ छ्योलिङ गुम्बाको प्रमुख लामा चन्द्रवीर लामा ( स्याङदेन म्हेम्हे) को 100 वर्षको जन्म दिन पालन गरिने भएको छ। 26 सेप्टेम्बर सन् 1922 मा जन्मेका स्याङ्देन म्हेम्हे आगामी 26 सेप्टेम्बरको दिन 100 वर्ष पूरा पुग्ने भएकोले उनको परिवार अनि बाघमारा बस्तीस्थित ज्याङ्तेर सामतालिङ छ्योलिङ गुम्बाको सञ्चालन समितिले जन्म दिन मनाउने भएको छ। उक्त विषयमा गुम्बा सञ्चालन समितिको सभा वर्तमान सभापति आनन्द तामाङको अध्यक्षतामा बसेर प्रमुख लामा स्याङदेन म्हेम्हेको 100 औं जन्मदिन पालन गर्ने निर्णय लिएको छ। सभापछि पत्रकारहरूसित कुराकानी गर्दै बाघमारा बस्तीस्थित ज्याङ्तेर सामतालिङ छ्योलिङ गुम्बाको पूर्व सभापति रञ्जन तामाङले स्याङदेन म्हेम्हेको 100 औं जन्म दिन आगामी 10 गते असोज अर्थात् 26 सेप्टेम्बरको दिन गुम्बा परिसरमा नै परिवार पक्ष र गुम्बा सञ्चालन समिति मिलेर पालन गरिने भएको जानकारी गराएका छन् ।