बाँदरको रगरगी रोक्नलाई खरसाङ शहरमा सचेतना रैली

खरसाङ (निसं) : खरसाङ बजारमा बाँदरको रगरगी रोक्नलाई खरसाङ महकुमा शासकको पहलमा लगातार रूपमा जनतालाई सचेत गराउने कार्य सम्पन्न भइरहेको छ। यसै क्रममा आज शनिबार पनि खरसाङ महकुमा शासक कार्यालयको पहलमा सचेतना रैली साथै सचेतना कार्यक्रम सम्पन्न गरियो। आज पनि सदा झैं खरसाङ रेलवे स्टेशन परिसरबाट सचेतना रैलीको आयोजना गरिएको थियो। उक्त रैलीले खरसाङ बजार इलाकाको परिक्रमा गऱ्यो। यस सचेतना रैलीमा खरसाङ महकुमा शासक कार्यालयका पदाधिकारीहरू, खरसाङ नगरपालिका, खरसाङ बजार क्षेत्रका विभिन्न संघ-संस्थाका प्रतिनिधिहरू, वरिष्ठ नागरिकहरू सामेल भएका थिए। उक्त रैलीपछि सम्पन्न पथ सभामा खरसाङ नगरपालिकाको भाइस चेयरम्यान सुवास प्रधानले सम्बोधन गर्दै खरसाङ बजारमा बाँदरको रगरगी रोक्नको लागि मानिसहरूलाई विभिन्न सुझाउ तथा सल्लाहरू दिए।